अरबी समुद्रात कमी दाबाचा पट्टा निर्माण झाला आहे. यामुळे कोकण, गोवा, आणि कर्नाटकासह किनारपट्टीवर जोरदार पाऊस बरसण्याची शक्यता आहे. मुंबईतील अनेक भागांत गुरुवारी मध्यरात्रीपासून पाऊस सुरु झाला आहे. वसई, विरार, आणि नालासोपाऱ्यात सकाळपासून दमदार पावसाची हजेरी आहे. मुंबईत आज दिवसभर पाऊस पडण्याची शक्यता आहे.
जुलै महिन्यात पावसाची सक्रियता:
जून महिन्यात विश्रांती घेतलेल्या पावसाने जुलै महिन्यात पुन्हा सक्रीयता दाखवली आहे. पुणे वेधशाळेने पुढील दोन दिवस जोरदार पावसाचा अंदाज व्यक्त केला आहे. विदर्भ, मध्य महाराष्ट्र, खानदेश, आणि कोकणात सर्वाधिक पाऊस होण्याची शक्यता आहे. राज्यातील काही भागांत ऑरेंज तर काही ठिकाणी यलो अलर्ट जारी करण्यात आले आहे. पश्चिम महाराष्ट्र आणि मराठवाड्यात देखील जोरदार पावसाचा अंदाज आहे. पुणे, सातारा, छत्रपती संभाजीनगर, जालना, परभणी, आणि नांदेड या भागांमध्ये देखील पाऊस होईल.
लोणावळ्यात मुसळधार पाऊस
इंद्रायणी नदीच्या पाणी पातळीत वाढ:
लोणावळ्यात आठ दिवसांपासून मुसळधार पाऊस सुरू असल्याने इंद्रायणी नदीच्या पाणी पातळीत वाढ झाली आहे. इंद्रायणी नदीवरील कोल्हापूर बंधारे वाहू लागले आहेत. पिंपरी-चिंचवड आणि पुणेकरांना जवळपास असलेलं कुंडमळा येथील धबधबे पर्यटकांना आकर्षित करू लागले आहेत. सतत पडत असलेल्या पावसामुळे येथील बंधाऱ्यावरून पाणी वाहू लागले असून याचा आनंद पर्यटक घेऊ लागले आहेत.
धुक्याची चादर:
मुसळधार पावसामुळे लोणावळ्यात धुक्याची चादर पसरली आहे. घाट माथ्यावरील पट्टा धुक्यात हरवल्याचे चित्र सध्या पाहायला मिळत आहे. थंडगार वारे आणि दाट धुके यामुळे लोणावळ्याचा निसर्ग मनमोहक झाला आहे. यामुळे स्वर्ग धर्तीवर अवतरल्याचे चित्र पर्यटकांना अनुभवायला मिळत आहे. निसर्गाची ही किमया लोणावळ्यातील टायगर पॉइंटवर पर्यटक अनुभवत आहेत.
Maharashtra Rains – वाहनचालकांसाठी आव्हान
वाहनचालकांची कसरत:
मुसळधार पावसामुळे वाहनचालकांना गाडी चालवताना मोठी कसरत करावी लागत आहे. धुक्यामुळे दृश्यता कमी झाली असून वाहन चालवताना विशेष काळजी घ्यावी लागत आहे. या आल्हाददायक वातावरणाचा आनंद नागरिकांना मिळत आहे. वर्षाविहारासाठी लोणावळ्यात सध्या देशभरातील पर्यटक दाखल होऊ लागले आहेत. येथील प्रसिद्ध चिक्कीवर ताव मारत पर्यटकांची पाऊले टायगर पॉईंटकडे वळू लागली आहेत.
हे ही वाचा – बाजारात धूमाकूळ घालायला येतोय OnePlus चा नवा दमदार स्मार्टफोन; OnePlus Nord 4 चा फोटो लिक, तुम्ही पाहिलात का?