टीम इंडियाने T20 वर्ल्ड कप 2024 जिंकून इतिहास रचला आहे. रोहित शर्माच्या नेतृत्वाखालील टीमने दक्षिण आफ्रिकेला 7 धावांनी हरवून किताब जिंकला. आता प्रत्येक भारतीय क्रिकेट चाहत्यांच्या मनात एकच प्रश्न आहे, “टीम इंडिया मायदेशी कधी परतणार?”
विजयी मिरवणूक आणि सन्मान
टीम इंडिया मायदेशी आल्यानंतर त्यांच्यासाठी खास विजयी मिरवणूक काढणार का? BCCI टीमला कसं सन्मानित करणार? या प्रश्नांची उत्तरे अजून मिळालेली नाहीत, पण चाहत्यांच्या मनात मोठी उत्सुकता आहे.
ऐतिहासिक विजयाचा आनंद
प्रत्येक भारतीय फॅन टीम इंडियाच्या वर्ल्ड कप विजयाची आतुरतेने प्रतिक्षा करत होता. अखेर शनिवारी संध्याकाळी ही प्रतिक्षा संपली. 17 वर्षानंतर टीम इंडिया पुन्हा एकदा T20 चॅम्पियन बनली आहे. 11 वर्षानंतर कुठली आयसीसी ट्रॉफी जिंकली आहे. टीम इंडियाच्या या यशाने संपूर्ण देशात उत्साह, जोश आणि आनंद भरला आहे.
परतण्याची प्रतिक्षा लांबणार?
वर्ल्ड कपच्या ट्रॉफीसह टीम इंडिया मायदेशी कधी परतणार? याकडे चाहत्यांचे डोळे लागले आहेत. बार्बाडोसमध्ये येणाऱ्या वादळामुळे ही प्रतिक्षा आणखी लांबू शकते. ब्रिजटाऊनच्या बार्बाडोसमध्ये 29 जूनला फायनल सामना खेळला गेला. या मॅचमध्ये टीम इंडियाने दक्षिण आफ्रिकेला 7 धावांनी हरवून वर्ल्ड कप जिंकला.
वादळामुळे परतण्याचा प्लान रद्द
रिपोर्टनुसार, काही तासांत हरिकेन बेरिल वादळ बार्बाडोसला धडकणार आहे. याच वादळामुळे ब्रिजटाऊनसह बार्बाडोसमध्ये सर्व एअरपोर्ट सध्या बंद आहेत. सर्व उड्डाणे रद्द करण्यात आली आहेत. त्यामुळेच टीम इंडियाला रविवारी ब्रिजटाऊनवरुन न्यू यॉर्कला जाण्याचा प्लान रद्द करावा लागला.
टीम इंडियाचा परतण्याचा प्लान
टीम इंडिया, सपोर्ट स्टाफ, बीसीसीआय अधिकारी आणि खेळाडूंच कुटुंब मिळून 70 सदस्य एमिरेट्स एयरलाइन्सच्या विमानाने न्यू यॉर्कला जाणार होते. तिथून दुबई मार्गे टीम इंडिया नवी दिल्लीला पोहोचणार होती. परंतु, वादळामुळे हा प्लान रद्द करण्यात आला आहे.
BCCIचा नवीन प्लान
BCCIने प्लानमध्ये बदल केला आहे. पीटीआय रिपोर्टनुसार, एका खास चार्टर फ्लाइटने 70 जणांना ब्रिजटाऊनवरुन थेट नवी दिल्लीला घेऊन येणार आहे. कुठल्याही परदेश दौऱ्यावरुन परतताना टीम इंडिया सर्वात आधी मुंबईत येते. पण यावेळी नवी दिल्लीला जाण्यामागे पंतप्रधान नरेंद्र मोदींची संभाव्य भेट हे एक कारण असू शकते.
2011 मध्ये टीम इंडियाने वर्ल्ड कप जिंकल्यानंतर धोनीसह संपूर्ण टीमने नवी दिल्लीत तत्कालीन राष्ट्रपती आणि पंतप्रधानांची भेट घेतली होती.
हे ही वाचा – शरद पवार: खरी राष्ट्रवादी कोणाची? 8 विरुद्ध 1, मोठ्या पवारांचे ठाम उत्तर