वादग्रस्त आयपीएस अधिकारी पूजा खेडकर यांच्या आई मनोरमा खेडकर यांना अखेर अटक करण्यात आली आहे. पुणे पोलिसांची चार पथके त्यांच्या शोधात होती. मनोरमा खेडकर रायगड जिल्ह्यातील एका फार्म हाऊस मध्ये लपल्या होत्या. बुधवारी त्यांना सापळा रचून अटक करण्यात आली.
मनोरमा खेडकर कशासाठी फरार होत्या
मनोरमा खेडकर यांच्यावर मुळशीमधील शेतकऱ्यांना धमकवल्याचा गुन्हा दाखल होता. त्यानंतर त्या फरार झाल्या होत्या. त्यांच्यावर पुण्यातील पौड पोलीस स्टेशनमध्ये शेतकरी पंढरीनाथ कोंडीबा पासलकर यांच्या तक्रारीनंतर गुन्हा दाखल करण्यात आला होता. मनोरमा खेडकर यांच्या अटकेसाठी पुणे पोलिसांची चार पथके काम करत होती.
अटकेनंतर काय होईल
पुणे पौड पोलीस मनोरमा खेडकर यांना घेऊन पुण्याकडे निघाले आहेत. त्यांना गुरुवारी दुपारी न्यायालयात हजर करण्यात येणार आहे. या प्रकरणात मनोरमा खेडकर यांच्यासह त्यांच्या पती दिलीप खेडकर, अंबादास खेडकर, दोन पुरुष बाउंसर, दोन महिला बाउन्सर आणि इतरांवरही गुन्हा दाखल करण्यात आला आहे.
काय होते प्रकरण
पुणे जिल्ह्यातील मुळशी तालुक्यातल्या धडवली गावात खेडकर कुटुंबाने 25 एकर वादाची जमीन खरेदी घेतली होती. या जमिनीचे प्रकरण न्यायप्रविष्ट होते. त्यामुळे शेजारी शेतकऱ्यांनी विरोध केला होता. पूजा खेडकर यांच्या आई मनोरमा खेडकर या बाउन्सर अन् गुंड घेऊन त्या ठिकाणी पोहोचल्या. त्यांनी हातात पिस्तूल घेऊन शेतकऱ्यांना धमकावले होते. वर्षभरापूर्वीच्या या प्रकाराचा व्हिडिओ व्हायरल झाला होता. त्यानंतर मनोरमा खेडकर यांच्यावर गुन्हा दाखल करण्यात आला.
पूजा खेडकर यांचे प्रशिक्षण थांबवले
वादग्रस्त प्रशिक्षणार्थी आयपीएस अधिकारी पूजा खेडकर यांचे प्रशिक्षण थांबवून त्यांना मसूरी येथील लाल बहादुर शास्त्री नॅशनल एकेडमी ऑफ एडमिनिस्ट्रेशनमध्ये तातडीने परत बोलवले आहे. पूजा खेडकर यांच्या कुटुंबाविरुद्ध असलेल्या वादामुळे त्यांचेही प्रशिक्षण थांबवण्याची गरज भासली.
पुढील कायदेशीर प्रक्रिया
मनोरमा खेडकर यांच्या अटकेनंतर पुणे पौड पोलीस त्यांना पुण्यातील न्यायालयात हजर करतील. त्यांच्या विरुद्ध असलेल्या गुन्ह्यांच्या तपासात आणखी काही माहिती पुढे येण्याची शक्यता आहे. त्यांच्या पती दिलीप खेडकर सध्या फरार आहेत आणि त्यांचा शोध सुरू आहे.
हे ही वाचा – ‘मुख्यमंत्री लाडकी बहिण’ योजनेनंतर आता लाडक्या भावांसाठीही योजना, १२वी पास तरुणांना मिळणार ‘एवढी’ रक्कम