महाराष्ट्र विधानपरिषद निवडणुकीत 12 जुलै रोजी गुप्त मतदान होणार आहे. त्यामुळे सर्व राजकीय पक्षांनी विजय मिळवण्यासाठी कंबर कसली आहे.
निवडणुकीचे तपशील
विधानपरिषद निवडणुकीत 11 जागांसाठी 12 उमेदवार रिंगणात उतरले आहेत. क्रॉस व्होटिंग टाळण्यासाठी सर्व पक्षांनी आपल्या आमदारांना हॉटेलमध्ये ठेवण्याचा निर्णय घेतला आहे, जेणेकरून त्यांचे मतदान सुरक्षित राहील आणि पक्षाच्या आदेशानुसारच होईल.
भाजपचे नियोजन
भाजपने त्यांच्या सर्व आमदारांना कुलाबा येथील प्रेसिडेंट हॉटेलमध्ये ठेवले आहे. काल रात्री विधिमंडळात भाजप आमदारांची बैठक पार पडली. त्यानंतर या आमदारांना हॉटेल प्रेसिडेंटमध्ये हलवण्यात आले. हे आमदार दोन दिवस या हॉटेलमध्ये राहणार आहेत. विधानपरिषदेच्या निवडणुकीसाठी भाजपने आमदारांची रंगीत तालीम घेतली. कोणत्या प्रकारे मतदान करायचे याबाबत आमदारांना सूचनाही देण्यात आल्या आहेत. तसेच कोणाचेही मतदान वाया जाणार नाही याची काळजी घ्यावी, असेही वरिष्ठांनी सांगितले.
ठाकरे गटाचे नियोजन
ठाकरे गटाने त्यांच्या सर्व आमदारांना आयटीसी ग्रँड सेंट्रलमध्ये ठेवण्याचा निर्णय घेतला आहे. ठाकरे गटाच्या नेत्यांनी आमदारांना खेळीमेळीच्या वातावरणात ठेवण्याचा प्रयत्न केला आहे. आदित्य ठाकरेही आमदारांसोबत राहणार आहेत. तसेच सर्व आमदारांचे राहण्याची व्यवस्था एकाच मजल्यावर करण्यात आली आहे.
आयटीसी ग्रँड सेंट्रल हॉटेलमध्ये सध्या अजय चौधरी, वैभव नाईक, उदयसिंग राजपूत, राजन साळवी, प्रकाश फातर्फेकर, राहुल पाटील, सुनील प्रभू, सुनील राऊत, संजय पोतनीस, आदित्य ठाकरे, रमेश कोरगावकर हे आमदार उपस्थित आहेत. कैलास पाटील, नितीन देशमुख, शंकरराव गडाख आणि भास्कर जाधव हे चार आमदार आज येण्याची शक्यता आहे.
कोणाचे किती उमेदवार रिंगणात?
महायुतीने 9 उमेदवार उभे केले आहेत. विरोधी महाविकास आघाडीने 3 उमेदवार रिंगणात आहेत. भाजपने सर्वाधिक 5 उमेदवार उभे केले आहेत. अजित पवार यांचा राष्ट्रवादी काँग्रेस पक्ष आणि एकनाथ शिंदे यांच्या शिवसेनेने प्रत्येकी 2 उमेदवार उभे केले आहेत. काँग्रेस आणि शिवसेना ठाकरे गटाने प्रत्येकी एक उमेदवार उभा केला आहे. शरद पवार गटाने शेतकरी आणि कामगार पक्षाचे उमेदवार जयंत पाटील यांना पाठिंबा दिला आहे.
पक्षीय बलाबल
महायुतीमध्ये भाजपचे 103, शिवसेनेचे 40 आणि राष्ट्रवादीचे 40 आमदार आहेत. महायुतीमध्ये महाराष्ट्र नवनिर्माण सेनेचा 1 आमदार, बहुजन विकास आघाडी 2 आमदार आणि प्रहार जनशक्ती पक्षाचा 1 आमदार आहे, इतरांसह, महायुतीकडे एकूण 203 आमदार आहेत. महाविकास आघाडीकडे काँग्रेसचे 37, शिवसेना ठाकरे गटाचे 16, राष्ट्रवादी शरद पवार गटाचे 12, समाजवादी पक्षाचे 2, भारतीय कम्युनिस्ट पार्टी (मार्क्सवादी) 1 आणि शेतकरी आणि कामगार पक्ष अशा 69 आमदारांचा पाठिंबा आहे. विधानपरिषदेच्या 11 सदस्यांचा सहा वर्षांचा कार्यकाळ 27 जुलै रोजी संपणार आहे, त्या जागा भरण्यासाठी निवडणूक आवश्यक आहे.